إتصل بنا اخبار الحزب  |  شهداء الحزب  |  الحزب بالصور  |  نشاطات إغترابية  |  من تاريخنا  
 

ثورة الروح

الأمين عجاج المهتار

نسخة للطباعة 2011-04-20

الارشيف

عينيك، عينيك يا سعادة تجي وتشوف

كيف الجحيم انبدل بربوعك سعاده

ولمعات روحك، بثورة زوبعة بتطوف

تا تشق عتم الفضا، بنوارها الهادي

عا كل مقلب حجر، وبكل متن وشوف

بالسهل، بالجرد، بالعرزال، بالنادي

موجات بحر الأمل بالتضحيه بتطوف

تيار عبيجرف الأصنام عالوادي

***

عينيك تقشع رفيقك بالخطر محفوف

عالموت داس، ومشي، وبالحق بينادي

جبار، قلبو بنور الزوبعه ملفوف

بيسابق العاصفه وبيقودها قياده

والليل والوحش صار برفقتو مألوف

والجوع والبرد والتشريد شي عادي

والأرض - لو نام – فرشه وبالفلك ملحوف

والشوك يما الحجر لو دبّر وساده

***

عينيك تقشع طوايف بعدها مزلوف

بتشك قلب الوطن تاتظل منقاده

شلعات، يا غبنها، والذيب ساق خْروف

للذبح، للسلخ، و"الرعيان" عحياده

جهّال وبيدّعوا بالفضل والمعروف

ونفوس "أوبة عبيد" منلّها سياده

وتقليدهم – لو درج – باخ وطلع مكسوف

والحق والفضل والامجاد للبادي

***

عينيك تقشع رجالك قلبها مشغوف

بالموت، للمجد عبدت أرضها عباده

ما عاد معروف "مارون" و"علي" و"معروف"

اخوان، صاروا الجميع بيهتفوا: بلادي

من ثورة الروح بالإيمان سلّوا سيوف

يا ويل يلي وطنهم بعد بيعادي

ميّات وألوف وقفوا للكفاح صفوف

بس الاشاره تجي، ويتمتم سعاده

***

عينيك تقشع حشيشة قلبنا الملهوف

عالشوق – لوما الامل – دقاتها هادي

ورواحنا المخلصه حامت عليها رفوف

بالعيد، كومات زهر العاصفه هادي

بينك وبين الوطن، مهما تحول ظروف

نفيوك؟ نسيوك؟ قبلك مسمروا الفادي

ومش بس بالعيد عنا مولدك معروف

وبكل رمشه إلك برواحنا ولاده


أول آذار، 1945


*الأمين عجاج يناجي سعاده في هذه القصيدة، ويكلمه عن بطولات القوميين وصبرهم ونجاحاتهم.


 
شبكة المعلومات السورية القومية الاجتماعية غير مسؤولة عن النص ومضمونه، وهو لا يعبّر إلا عن وجهة نظر كاتبه
جميع الحقوق محفوظة © 2017